O fillo predilecto do Concello do Valadouro sigue dando moitas e boas novas no teatro e a literatura galega. O Concello de Ribadavia outórgalle a V Edición do Premio Abrente de Textos Teatrais dentro da celebración da Mostra Internacional de Teatro. O Xurado gaba o título gañador "Aquelas cousas do verán" pola madureza da linguaxe e polas posiblidades escénicas do texto. Por outra banda, o vindeiro 28 de xullo, Manuel Lourenzo presenta na Casa da Cultura (que leva o seu nome)o libro "Medea dos fuxidos e outras pezas" editado por Biblos na Colección Mandaio, reivindicando a lectura de textos teatrais. O acto, que terá lugar ás 20 horas, será introducido por Tucho Calvo, xornalista e responsable de Biblos.